Rusiye arbiyleri yılnıñ başından berli Ukrayinağa 27 700 ava bombası, aman-aman 11 200 "Şahed" ve aman-aman 9 000 diger tipte uçaqsız uçaq, em de 700-den ziyade raketa tüşürdi, dep bildirdi Ukrayina prezidenti Volodımır Zelenskıy, Rusiye lideri Vladimir Putinniñ ABD prezidenti Donald Trampnıñ maruzasında aytqanlarını izaatlap.
"Putin cezasızlıqnı is ete ve Rusiye ücümlerinden soñ da cevaplar azırlay. Bu demek ki, er bir yañı darbe, er bir yañı diplomatik toqtatma ile Rusiye bütün dünyağa orta parmağını köstere. Rusiyege qarşı basqını arttırmaq istemegen er keske. Barışıqqa ise tamam Rusiye irişmeli. İşte anda, Moskvada, cenkniñ öz fiyatı bar olğanını is etmek kerekler ", — dep yazdı Zelenskıy içtimaiy ağlarda.
Onıñ aytqanına köre, "Dünya Putinden kelgen telükelerge zayıf cevap berse, bunı o, dünyanıñ onıñ areketlerine köz yummağa azırlığı olaraq tanıy". "O, böyle munasebetni yañı vahşiyliklerge, yañı darbelerge, yañı öldürüvlerge sessiz izin olaraq tanıy", — dep qoştı Ukrayina devletiniñ yolbaşçısı.
İlk yaz ayınıñ 4-nde ABD prezidenti Donald Tramp, Rusiye lideri ile subet keçirgenini bildirdi, onıñ devamında Putin, uçaq alanlarına yapılğan ücümge cevap bermege mecbur olacaq, dep qattı ayttı.
İlk yaz ayınıñ 1-nde Ukrayina dronları bir qaç Rusiye arbiy ucaq alanına ücüm etti. Ukrayina telükesizlik hızmetiniñ malümatına köre, 40-tan ziyade Rusiye arbiy uçağı yoq etilgen. Kıyivde bildirilgenine köre, ameliyat bir buçuq yıl devamında azırlanıla edi.
Azatlıq Radiosı video ve uydu resimleriniñ talili sayesinde eñ azından 11 Rusiye strategik bombardıman uçağınıñ yoq etilmesini tasdıqladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
